Matius 2

1 Yesus inakan hong lewu Betlehem hong tanah Yuda; je manjadi raja metoh te iete Herodes. Hong katika te pire-pire ahli ilmu bintang bara timor dumah akan Yerusalem.

2Ewen misek hong hete-hete, "Hong kueh Anak te, je inakan uka manjadi Rajan oloh Yehudi? Ikei mite bintang Ayue lembut hila timor, tuntang ikei dumah mangat manyembah Ie."

3Katika Raja Herodes mahining hal te, ie paham tarewen, kalote kea kakare oloh hong Yerusalem.

4Ie manyoho kakare imam kapala tuntang kare guru agama oloh Yehudi dumah hapumpong. Palus ie misek dengan ewen, "Hong kueh Raja je injanji Hatalla te akan inakan?"

5Ewen tombah, "Intu Lewu Betlehem hong tanah Yuda. Basa kalotoh auh je inyurat awi nabi,

6'Ikau Betlehem hong tanah Yuda ikau samasinde dia je pangkakorike bara kare lewu mambatang hong Yuda. Karana bara ikau akan dumah ije biti pamimpin je akan mamimpin Israel.'"

7Limbah mandino katarangan te, Herodes mantehau kare ahli bintang bara timor te suni-suni. Palus ie misek dengan ewen hamparea katika je pas ewen nampara mite bintang te.

8Limbah te ie manyoho ewen akan Betlehem dengan peteh kalotoh, "Lius, gau Anak te titi-titip. Tuntang amon keton sondau Ie, sanan akangku, mangat aku kea manalih manyembah Ie."

9Balalu ewen haguet. Ewen mite tinai bintang je gitan ewen bihin hila timor. Paham kahanjak ewen mite bintang te! Bintang te mananselo ewen, balalu tende hunjun eka Anak te.

10 (2:9)

11Ewen tame akan huang huma te tuntang mite Anak te dengan indu Ayue Maria. Ewen sontop tuntang manyembah Anak te, palus mukei sarangan ramon ewen, tuntang manenga Akae amas, garo, tuntang mor.

12Hatalla mampingat ewen huang nupi uka ela haluli manalih Herodes. Jadi ewen buli mahoroi jalan je beken.

13Limbah kare ahli bintang te haguet, malekat Tuhan mamparahan arepe akan Yosep huang nupi. Malekat te hamauh, "Herodes handak manggau Anak te palus mampatei Ie. Tagal te misik, imbit Anak te dengan indu Ayue hadari akan Misir. Melai ih intu hete sampai Aku hakotak tinai dengam."

14Yosep misik, tuntang alem te kea ie mimbit Anak te dengan indu Ayue hadari akan Misir.

15Ewen melai hete sampai Herodes matei. Kalote maka manjadi taloh ije insanan Tuhan mahalau nabi Ayue kalotoh, "Aku mantehau anak-Ku bara Misir."

16Katika Herodes katawan ahli bintang bara timor te mananjaro ie, ie paham balait. Palus ie marentah uka mampatei anak hatue je umure due nyelo kapenda intu Betlehem tuntang eka hakalilinge. Jete cocok dengan katarangan je dinoe bara kare ahli bintang te tuntang katika bintang te gitan.

17Kalote maka manjadi taloh je insanan awi Nabi Yeremia, iete,

18"Intu Rama tarahining auh tatum, tarahing hayak tangis. Rahel manatum kare anake ie jaton maku iampong awi ewen jari nihau."

19Limbah Herodes matei, katika Yosep magon hong Misir, ije malekat Tuhan mamparahan arepe tinai akan Yosep huang nupi.

20Malekat te hamauh, "Kare oloh je handak mampatei Anak te jari nihau. Tagal te misik, duan Anak te dengan indu Ayue tuntang buli akan Israel."

21Maka Yosep misik, palus mimbit Anak te dengan indue haluli akan Israel.

22Tapi rahian Yosep mahining Arkelaus, anak Herodes jari mangganti bapae manjadi raja hong Yuda. Jadi Yosep mikeh haguet akan hete. Limbah ie mandino Nasehat tinai bara Tuhan huang nupi, ie haguet manalih daerah Galilea.

23Hong hete ie melai intu lewu je arae Nasaret. Kalote maka manjadi taloh je insanan awi kare nabi tahiu anak te: "Ie kareh inyewut Oloh Nasaret."

Matius 1

Matius

1 Jetoh daptar tato hiang Yesus Kristus, Turonan Dawid, Turonan Abraham. Aran kare tato hiang Yesus bara Abraham sampai Dawid te kalotoh: 2 Abraham, Isaak, Yakob, Yuda tuntang kare paharie, Peres tuntang Serah (indu ewen te arae Tamar), Hesron, Aram, Aminadab, Nahason, Salmon, Boas (indue te Rahab), Obed (indue te Rut), Isai, tuntang Raja Dawid.

3 (1:2)

4 (1:2)

5 (1:2)

6 Bara Dawid sampai katika oloh Israel inawan akan Babel maka aton tarasurat kare aran toh: Salomo (indue te solake sawan Uria), Rahabeam, Abia, Asa, Yosapat, Yoram, Usia, Yotam, Ahas, Hiskia, Manase, Amon, Yosia, Yekhonia tuntang kare paharie.

7 (1:6)

8 (1:6)

9 (1:6)

10 (1:6)

11 (1:6)

12 Bara wayah oloh Israel inawan akan Babel sampai Yesus inakan, maka aton tarasurat kare aran toh: Yekhonia, Sealtiel, Serubabel, Abihud, Eliakim, Asor, Sadok, Akhim, Eliud, Eleasar, Matan, Yakob, Yosep, banan Maria. Tuntang bara Maria te jari inakan Yesus je inyewut Kristus.

13 (1:12)

14 (1:12)

15 (1:12)

16 (1:12)

17Jadi bara Abraham sampai Dawid, samandiaie aton epat walas turonan. Bara Dawid sampai wayah oloh Israel inawan akan Babel sampai Kristus inakan, aton tinai epat walas turonan kea.

18Kalotoh auh saritae tahiu Yesus Kristus inakan. Indu Ayue, iete Maria, batunangan dengan Yosep. Tapi helo bara ewen kawin, te gitan ampin Maria te jari mimbit arepe. Tapi Yosep jaton katawan je Maria te batihi awi Roh Hatalla.

19Yosep, tunangae te, puna oloh je baketep manumon kare atoran agama. Jadi ie handak manggeto hubungae dengan tunangae te suni-suni uka Maria dia impahawen hong taharep oloh are.

20Pandehan Yosep manirok hal te, te ie tapatiroh palus nupi. Hong nupie  te ie mite ije malekat Tuhan hamauh dengae, "Yosep, Turonan Dawid, ela mikeh kawin dengan Maria; basa anak je huang kanaie te manjadi awi kuasan Roh Hatalla.

21Maria kareh manak ije biti anak hatue. Ikau musti manenga aran anak te Yesus, karana Ie manyalamat ungkup Ayue bara dosan ewen."

22Taloh handiai te manjadi kalote uka tulus taloh je insanan Tuhan mahalau nabi Ayue, iete,

23"Ije biti bujang salia kareh batihi tuntang manak ije anak hatue. Anak  te kareh inggare Imanuel." (Imanuel jete auh kotak bara basa Ibrani, rimae, "Hatalla aton hinje itah".)

24Limbah te Yosep misik, ie malalus taloh je insanan malekat Tuhan te akae. 25 Ie kawin dengan Maria. Tapi katahin Maria hindai luas anak te, Yosep dia hinje batiroh dengan Maria. Limbah anak te jari inakan, Yosep manenga arae Yesus.